s Churi

Eigetli hed si Karin gheisse. Aber alli im Dorf heinere Churi gseit. Wie si zu däm Übername choo isch hed si äuwä sälber nid gwüsst. Aber irgendwie hed er passt zu däm tolle Meitschi mid em burschikose Bubischnitt. Si isch eini vo der chlynere Sorte gse – hed kei Figuur gha wien es Fotimodäll. Au glouffe isch si nid so elegant, mid zgrosse Schritt und uswäiende Arme. Aber es Gsicht hed si gha zum drybisse midere Huut wie nes ryfs Ziperli: mid glänzige Rehouge, eme Näsli wie d Silvie Vartan, gspickt mid neckische Loubfläcke. Derzue es gwünnends, natürlechs Lache.  Eisder gchäferig und hälluuf, so hed me si könnt! Däwä hed ihres hübsche Gsüün und ufgstellte Wäse ihri chlyne Makel meh als wettgmacht. Kei Wunder, isch si d Troumfrou vo mängem Burscht gsi zäntume im Dorf. Aber chuum eine hed sich gwogt si azhoue. Worum au? Vilecht isch de Giele ihres Uufträtte zsälbschtbewusst gsi? Vilecht hei si drum dänkt, e Hiesige chiem bi ihre sowieso nid id Kränz.

Au im Rolf hed si gfalle. Er isch es Johr älter gsi als s Churi. Öppedie si sich die zwöi im Bus begägned und hei zäme es paar Wort gwächsled – übers Wätter, über d Arbed oder über was grad im Kino oder süsch gloufen isch halt. S Churi isch zwar immer fründlig gsi zum Rolf, aber Signal, dass si öppe midem wetti abändle, hed si keini usgsänded. Jedefalls hed das der Rolf so wohrgnoh. No vil meh als der Rolf, hed aber si bescht Fründ, der Geri es Oug uf si gworfe. Er hed grüüsli der Naar gfrässe gha a däm Meitschi.

Am Füürobe nochem schaffe, hei sich die beede Chuuter mängisch no im Restaurant Casino zumene Bier troffe, zäme mid no andere Kollege. Do isch über Chauf und Louf gredt worde. Natürli ou über die bueberige Meitschi im Dorf. Einisch isch derby ou s Churi ufs Tapeet brocht worde und jede hed plagiert wien är bi ihre gross im Büechli stieng und meh Chance heb als der ander. Beed si schaluus gsi ufenand, öppe wenn der eint si zuefällig im Dorf atroffe hed oder wenn si mid eim vone amene Dorfäscht gar es Tänzli gmacht hed. Im Kino Palace z Olten isch zu däiner Zyt grad der Film „Die eiserne Maske“ midem Jean Marais gloufe, en Abentüürfilm us der Musketierzyt. Derzue hed der Rolf alti Däägen und Revolver und Gwehr gsammled. Dänk wägedäm isch der Geri sälb Oobe uf die gschydi Idee choo, der Rolf zumene Duell mit zwee vo sine Säbel usezfordere. „Wär putzi, sell s Churi überchoo“, hed er praschted! „Und der Verlüürer sell uf immer uf si verzichte“. Der Rolf hed die Useforderig ohni lang zwärweise agnoh und isch deheim zwee Säbel go hole. Dawä hei die Chuter näbem Casino drufabe d Klinge gkrüüzt, dass Funke gsprüeit si und d Säbelklinge wüesti Scharte überchoo hei. Glücklicherwys isch bi däm Duell keine vo dene zwe Hitzchöpf ärnschthaft verletzt worde. Nachdäm aber der Geri binere dumme Bewegig der Arm verwirsed und der Kampf hed müesen ufgee hed sich der Rolf als Sieger gseh.

Drum hed er scho am nöchschte Wuchenänd guraschiert em Churi aglüüted um si Siegerprys yzfordere. Hous oder stächs, hed er dänkt. Si cha mer jo höchschtens Abchabis gee. D Mueter heds Telefon abgnoo. Au s Post-Mili, so isch ihre Dorfname gsi, isch e rassigi Frou gsi. Zum guete Glück hed si nid chöne gseh, wie nervös der Rolf gsi isch.

„Grüezi Frou Steiner, do isch der Frei Rolf. Dörfti ächt mit der Karin rede?“ „Was der Frei Rolf? E Mömänt, i rüefere grad“ heds am andere Änd tönt. „Jo do isch d Karin“ seit e fini Stimm churz drufabe. „Hoi Karin, i bis, der Rolf“. Er hed si bim richtige Name gnennt, wil er gwüsst hed, das si ihren Übername nid so gärn ghört hed. „Rolf? Was wotsch de du vo mir?“ hed si verstuunt gseit. Und dä hed ihre verzellt vo sim Duell midem Geri und das er jetz berächtiged sig, si emol yzlade, vilecht zumene Kinobsuech, a nes Konzärt oder zunere Wanderig? „Dir Spinncheibe“, hed si lachend gmeint. Aber so, wie ebe s Churi gsi isch, seit si spontan: „Also guet, wie wärs ufe Belche? Wenn göimer?“

Am Mittwuch drufabe isch der Rolf mit sim Sennehund Beni erwartigsvoll zur Gartestroos gschuened. Er hed e halbe Taag Ferie gnoh. S Churi hed am däm Wochetaag frei gha, wils Schuehgschäft wo si gschaffed hed am Mittwoch zue gsi isch. Sis Härz hed poppered woner ufs Lüüti drückt hed a der Türe hingerem Huus, während der Beni dernäbe erwartigsvoll mid em Schwanz gwädled hed. Wo do s Churi d Türe uftoo und em Rolf underem Türgreis lächelnd d Hand ergäge gstreckt hed, isch zu sim Härzchlopfe au no nes Chrible im Buuch derzue cho. Er hed si müesen aaluege vo zoberscht bis zunderscht i ihrer blaue, schwarz tüpflede Bluuse, den umeglitzte blaue Jeans, wo sälbzyt neu vo Amerika ufchoo si. Alles hed eifach passt zu ihrem Typ. „Guet gsesch us“, hed der Rolf liecht errötend gseit und s Churi hed das Komplimänt dankend entgäge gnoo. Derno si si ufbroche.

Mid stramme Schritt si die zwöi losgschuened dure Buechlibann, der stotzig Horeb uuf em Hombärg zue. Und vo dört ähneabe über Juraweide und am Hof Fasiwald verby wider obsi Richtig Belchenflueh. Sisch Herbst gsi und der Wald hed sich in siner schönschte Farbenpracht präsentiert. Si heis sich vil z verzelle gha, uf em länge Wääg hogeruf, hogerab über geechi Stääg und Juraweide. Momoll, si hei nanger guet möge und verstande. Uf em Gipfel aachoo, hed der Rolf zwee Landjäger, e grosse Schübel Brot und e Thermosfläsche voll Tee uspackt, wonem d Mueter i sim Rucksack mitgeh hed und beidi hei die wunderschöni Uussicht gnosse is Baselbiet,is Mittelland und id Alpe. No so gärn hätt der Rolf dört obe em Churi welle säge, dass si ihm bsungers guet gfalli, aber er hed sich nid getrout. Und er hed au nid gmerkt, dass s Churi ihn au echly meh als guet mag, hed ihri Blick und Körpersrooch nid chöne düüte. Er hed no zweeni Erfahrige gah mit Froue is sim jungen Alter.

Es Wyli spööter isch es Zyt gsi für die beede ufzbräche. Bärgab zum General-Wille-Huus und vo dört wider zdoruuf i der Homberglücke zue. Im General-Wille-Huus nide isch wie so mängisch Militär yquartiert gsi, gwahnli Infanterie vom Soledurner Regimänt 11. Wo si dört verbychoo si, si öppe füfzg Soldate grad derby gse, der Interni Dienst zverrichte, das heisst ihri Chleider, Schueh und s Gwehr zputze. Do plötzlich rüeft ine e bekannti Stimm noche: „Lodööd! Das glaubi jo nid! Was mached den ihr zwöi do obe“. By nöcherem häreluege hei si bigoscht der Heinz erkönnt, ihre ehemalig Schuelkamerad. Är hed als Korporal der Putzdienst müese beufsichtige. Der Heinz hed verzellt, dass sie jetzt scho die zwöiti Wuche ohni Urlaub do obe im WeKa sige. Wyt ewägg vo Lüüt und Zivilisation. I Usgang uf Ifenthal abe sigs zwee Stund zschienggle, hi und zrugg. Drum blube d Lüüt lieber im Kantonnemänt. Notisnoo sige Geisse do obe aber nümme so sicher. Währenddäm der Heinz gredt hed, si d Blick vonere Kompanie Manne am Gwehrputze uf s Churi grichted gsi. Me hed ne d Gluschst a de Stilouge vo wytem agseh. Hejo, wenn d Geisse i Gfohr gsi si, denn erscht rächt es amächeligs Meitschi wie s Churi! Die heds nid ungärn gha, wen ire d Manne nochegluegd hei, aber do isch’s ere de doch echly gschmuech worde und si hed im Rolf z verstoh gee, dass si neume gly wetti d Finke chlopfe. Drum hei se sich von Heinz verabschided.

Doben ufem Bödeli am Waldrand hei beedi nomol zrugg gluegt und gseh, dass mene mid allne verfüegbare Kompaniefäldstächer nochegspärpered hed. „Wei mer die Däätle chly fertig mache?“ seit der Rolf zu siner Begleiteri. Die hed sofort verstande was er gmeint hed und hed en ungsinned umärvled. Ungstüm hei si sich is Gras lo gheihe und s Churi hed nüüt dergäge gha, dass der Rolf si gküsst hed.  Nur der Hund Beni hed ganz verstöbered afe bälle. Was für Usdrück währendäm im General-Wille-Huus unde gfalle si, hed der Rolf zum guete Glück nid müese ghöre. „Dä Seckel“, „dä abschlagnig Fagant“, „dä truurig Siech, usgrächned midem Churi“ und anderi Schlötterig hei si nem aghänkt. Der Rolf aber hed die unverhoffti Bereitschaft vom Churi mid ihm zschmuuse gnosse. Der Uslöser si aber eigentli die geile Soldate vom 11. Soledurnerregimänt gsi!

Glücklich hei sich die zwöi derno früsch verliebt ufe Heiwääg gmacht. Der Beni isch bällend voruus gsprunge. S hed scho afe ynachte und s Bättzytglöggli hed me vo wytem ghört klänke, wo die zwöi uf der Wangner Allmänd achoo si.

Advertisements

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s